‘హీరోయిన్’తో కోట్ల స్కామ్ బయటకు! భారతీయ అమెరికన్కు 9 ఏళ్ల జైలుశిక్ష

March 3, 2017

అలెగ్జాండ్రియా: నకిలీ పాస్‌పోర్టులు, క్రెడిట్‌ కార్డులు, నగదు అక్రమ బదిలీ కుంభకోణంలో లక్షల డాలర్లు సంపాదించిన ఓ భారతీయ అమెరికన్‌కు అమెరికా కోర్టు జైలుశిక్ష విధించింది. 1992లో అమెరికాకు వెళ్లిన అమిత్‌ చౌదరి అనే వ్యక్తికి అలెగ్జాండ్రియా ఫెడరల్‌ కోర్టు తొమ్మిదేళ్ల జైలు శిక్ష విధించింది. తానెప్పుడూ జైలుకు వెళతానని అనుకోలేదని, కుటుంబం కోసమే ఈ నేరాలకు పాల్పడ్డానని అమిత్‌ చెప్పాడు. ఎఫ్‌బీఐ ఏజెంట్‌ ఒకరు అమెరికాలోని బుల్లితెర నటి లారా వండెర్‌వూట్‌ చిత్రాన్ని నకిలీ పాస్‌పోర్ట్‌పై చూడడంతో ఈ కేసులు వెలుగులోకి వచ్చాయి.

క్రెడిట్‌ కార్డులు కొట్టేసి..
అమిత్‌చౌదరి ఇతరుల క్రెడిట్‌ కార్డులు చోరీ చేసి ఆ డబ్బును షెల్‌ బ్యాంకు ఖాతాల ద్వారా అక్రమంగా బదిలీ చేసేవాడు. తక్కువ ధరలకే ప్రయాణ ప్యాకేజీలు అందిస్తామంటూ ప్రకటనలు ఇచ్చేవాడు. ఆ తర్వాత వినియోగదారుల డబ్బులు కొట్టేసేవాడు. చోరీచేసిన క్రెడిట్‌ కార్డులతో వారి హోటల్‌, ప్రయాణ, భోజన బిల్లులు చెల్లించేవాడు. భారత్‌లోని అమెరికన్‌ ఎక్స్‌ప్రెస్‌లో పనిచేసే ఓ వ్యక్తి సాయంతో నకిలీ క్రెడిట్‌ కార్డులు సృష్టించి 25 మిలియన్‌ డాలర్లు కొల్లగొట్టాడు. చివరికి టీవీ నటి లారా చిత్రం నకిలీ పాస్‌పోర్ట్‌పై గమనించిన ఎఫ్‌బీఐ అమిత్‌ చౌదరి బృందంపై కన్నేసి వారిని పట్టుకొంది. తనతో పాటు మరికొందరికి ఈ కుంభకోణంతో సంబంధమున్నట్లు అమిత్‌ తెలిపాడు.