Gumpu mesthri, one more circus..!

[Peruthopaniemundhi]

Kishan Reddy: బీసీ రిజర్వేషన్లను 2% తగ్గించిన ఘనత రేవంత్‌రెడ్డిదే

ఇంతకు ముందున్న 34 శాతాన్ని 32కి కుదించారు
ఇప్పుడు 42% అంటున్నా.. అందులో 10% వెళ్లేది అసదుద్దీన్, అక్బరుద్దీన్, అజారుద్దీన్‌లాంటి ధనిక ముస్లింలకే
మెట్రో రైల్‌ ప్రాజెక్టుపై సీఎం చెప్పేవన్నీ అబద్ధాలే
దిల్లీలో కేంద్రమంత్రి కిషన్‌రెడ్డి

ఈనాడు, దిల్లీ: స్థానిక సంస్థల్లో బీసీ రిజర్వేషన్లను 2% తగ్గించిన ఘనత ముఖ్యమంత్రి రేవంత్‌రెడ్డికే దక్కుతుందని కేంద్ర బొగ్గు, గనులశాఖ మంత్రి జి.కిషన్‌రెడ్డి ఎద్దేవాచేశారు. ప్రస్తుతం బీసీ రిజర్వేషన్లను 42%కి పెంచినట్లు ఆయన ఆర్భాటం చేస్తున్నా అందులో వాస్తవంగా వారికి వచ్చేది 32శాతమేనని, మిగిలిన 10% అసదుద్దీన్‌ ఒవైసీ, అక్బరుద్దీన్, అజారుద్దీన్, షబ్బీర్‌ అలీ లాంటి డబ్బున్న ముస్లింలకే వెళ్తాయని పేర్కొన్నారు. మతం ప్రాతిపదికన కాకుండా మొత్తం 42% రిజర్వేషన్లను నిజమైన బీసీలకు మాత్రమే వర్తింపజేయాలని డిమాండ్‌ చేశారు. ప్రధానమంత్రి నరేంద్రమోదీని రేవంత్‌రెడ్డి... కన్వర్టెడ్‌ బీసీ అని అంటున్నారని, ప్రధానిని విమర్శించే ముందు రాహుల్‌గాంధీ సామాజికవర్గమేంటో బహిర్గతం చేయాలని సవాల్‌ విసిరారు. ఆయన శుక్రవారం ఇక్కడి తన నివాసంలో విలేకర్లతో మాట్లాడారు. ‘‘ఇప్పుడున్న 4% ముస్లిం రిజర్వేషన్లను 10%కి పెంచి బీసీలకే 42% రిజర్వేషన్లు ఇస్తున్నామని కాంగ్రెస్‌ వెనుకబడిన తరగతులను మోసం చేస్తోంది. మోదీ తీసుకొచ్చిన 10% ఈడబ్ల్యూఎస్‌ రిజర్వేషన్లలో ముస్లింలకు వాటా ఉన్నప్పుడు మళ్లీ ఇప్పుడు ప్రత్యేకంగా 10% ఎలా కేటాయిస్తున్నారో ముఖ్యమంత్రి చెప్పాలి. గతంలో జీహెచ్‌ఎంసీ ఎన్నికల్లో 34% బీసీ రిజర్వేషన్లు అమలు చేసిన చరిత్ర ఉంది. ఇప్పుడు పెంచినట్లు చెబుతున్న 42%లో ముస్లింలకు 10% పోతే బీసీలకు మిగిలేది 32 శాతమే. దీన్నిబట్టి బీసీల కోటా తగ్గినట్లా, పెరిగినట్లా అన్నది ముఖ్యమంత్రి సమాధానం చెప్పాలి. జీహెచ్‌ఎంసీలోని 150 డివిజన్లలో 50 డివిజన్లను బీసీలకు రిజర్వ్‌ చేస్తే అందులో 30 సీట్లలో మజ్లిస్‌ పార్టీ వాళ్లు గెలిచారు. మళ్లీ ఇప్పుడు 42%లో 10% ముస్లిం కోటాను కలపడం వల్ల హైదరాబాద్‌తోపాటు రాష్ట్ర వ్యాప్తంగా మున్సిపాల్టీల్లో అన్ని బీసీ సీట్లలో ముస్లింలకు పోటీచేసే అవకాశం దొరుకుతుంది. దీనివల్ల ఏ సామాజిక వర్గానికి లబ్ధి చేకూరుతుందన్నది బీసీలు ఆలోచించుకోవాలి. మూడు రాష్ట్రాల్లో అధికారంలో ఉన్నామన్న పేరుతో కుప్పిగంతులు వేస్తున్న కాంగ్రెస్‌పార్టీకి ఉన్న ఆ మూడూ ఊడిపోవడం ఖాయం. వందమంది రాహుల్‌గాంధీలు, వేయిమంది రేవంత్‌రెడ్డిలు వచ్చినా సరే అక్కడున్న ప్రభుత్వాలు కొట్టుకుపోతాయి.

మెట్రో డీపీఆర్‌ ఇటీవలే వచ్చింది..

హైదరాబాద్‌ మెట్రో రైల్‌ ప్రాజెక్టుపై ముఖ్యమంత్రి రేవంత్‌రెడ్డి పదేపదే పచ్చిఅబద్ధాలు మాట్లాడుతున్నారు. మెట్రో రెండోదశకు సంబంధించి ఈ మధ్యే రాష్ట్ర ప్రభుత్వం నుంచి డీపీఆర్‌ వచ్చింది. దానిపై కేంద్రం అధ్యయనం చేయాలి. కేంద్ర పట్టణాభివృద్ధిశాఖ మంత్రి మనోహర్‌లాల్‌ఖట్టర్‌ ముఖ్యమంత్రి రేవంత్‌రెడ్డిని దానికి సంబంధించి కొన్ని అంశాలపై వివరణ అడిగారు. ప్రాజెక్టు నిర్వహణ, ఆదాయ పంపిణీ తదితర అంశాలపై కేంద్రమంత్రి రాష్ట్రాన్ని ప్రశ్నించారు. వీటిపై ఒక ఒప్పందానికి రావడానికి కేంద్ర, రాష్ట్ర ప్రభుత్వాలు, హైదరాబాద్‌లో ఇప్పటికే మెట్రోను నిర్వహిస్తున్న ఎల్‌అండ్‌టీతోపాటు, మెట్రో రెండో దశ చేపట్టబోయే సంస్థల మధ్య ఎంవోయూ జరగాలి. వాటిపై ఎలాంటి అవగాహనకు రాకుండానే ప్రాజెక్టుకు ఎలా అనుమతి ఇస్తారు? ఇప్పటికే ఎల్‌అండ్‌టీ సంస్థ నష్టాల్లో ఉంది. రేపు వచ్చే కొత్త లైన్‌కు నష్టాలు వస్తే ఎవరు భరిస్తారు అన్నదానిపై స్పష్టతకు రావాల్సి ఉంటుంది. కేంద్ర ప్రభుత్వం దేశంలోని అన్ని ప్రధాన నగరాలకూ మెట్రోరైలు ప్రాజెక్టులు ఇచ్చింది. 

 

ప్రస్తుతం తెలంగాణలో నడుస్తున్న హైదరాబాద్‌ మెట్రోకు రూ.1,400 కోట్లు సాయం చేసింది. భవిష్యత్తులోకూడా రాష్ట్ర ప్రభుత్వానికి 100% సహకారం అందించడానికి కట్టుబడి ఉంది. ముఖ్యమంత్రి లేఖ ఇచ్చినంత మాత్రాన వెంటనే డబ్బులివ్వరు. పైన ప్రస్తావించిన ప్రశ్నల గురించి ముఖ్యమంత్రిని అడిగితే ఆయన తనకేమీ అవగాహన లేదని, తమ అధికారులను తీసుకొస్తానని, ఇరుపక్షాల అధికారులతో కలిసి కూర్చుందామని అంటే కేంద్ర మంత్రి మనోహర్‌లాల్‌ఖట్టర్‌ ఓకే చెప్పారు. ఆ తర్వాత తెలంగాణ ప్రభుత్వం నుంచి ఇంతవరకూ అధికారులెవ్వరూ రాలేదు’’ అని కేంద్రమంత్రి కిషన్‌రెడ్డి పేర్కొన్నారు.