నిజమైన సంతోషం ఎలా కలిగింది? ప్రేమ్జీని కదిలించిన చిన్నారి ప్రశ్న

[JANASENA]

ఇంటర్నెట్‌డెస్క్‌ ప్రత్యేకం : ‘‘ మీకు నిజమైన సంతోషం కలిగించేందుకు దోహదం చేసిన పరిస్థితులు ఏమిటన్న ప్రశ్నను రాజస్థాన్‌కు చెందిన ఒక 11 ఏళ్ల బాలిక సంధించింది. ఆ చిన్నారి పరిశుద్ధ హృదయంతో అడిగిన ప్రశ్న నన్ను కదిలించింది. ఆ క్షణమే మన సమాజానికి ఏదో ఒకటి చేయాలనిపించింది. ఆ ఆలోచనల్లో పుట్టిందే ఈ ఫౌండేషన్‌’’ అని భారత ఐటీ దిగ్గజం విప్రో ఛైర్మన్‌ అజీం ప్రేమ్‌జీ తన సంస్థ ఉద్యోగులకు రాసిన లేఖలో పేర్కొన్నారు. దేశంలోని ప్రముఖ కంపెనీల్లో ఒకటైన విప్రో అనేక దాతృత్వ కార్యక్రమాలను చేపడుతోంది. సంస్థకు వచ్చే ఆదాయంలో అనేక సమాజసేవా కార్యక్రమాలకు వినియోగిస్తున్నారు.

ఉన్నత సమాజం కోసం.. 
ప్రతి ఏటా నూతన సంవత్సరాదిని పురస్కరించుకొని అజీం ప్రేమ్‌జీ తన సంస్థలో పనిచేసే ఉద్యోగులకు లేఖ రాస్తారు. ఆ ఏడాదిలో ఎలాంటి సంక్షేమ కార్యక్రమాలు చేపట్టనున్నారో వెల్లడిస్తారు. దాదాపు ఐదు దశాబ్దాలుగా దేశంలో ఉన్నత విలువలను పాటిస్తున్న సంస్థలో విప్రో ఒకటి. ప్రేమ్‌జీ విశ్వవిద్యాలయం ద్వారా అనేక మంది ఉపాధ్యాయులకు, మేధావులకు సోషల్‌ వర్క్‌లో శిక్షణ ఇచ్చారు. దేశంలోని అనేక ప్రాంతాల్లో విద్యను అభివృద్ధి చేసేందుకు పలు పథకాలను అమలు చేశారు. సమాజంలోని సమస్యలను పట్టించుకోకుండా ఉండటం కంటే వాటిపై దృష్టి నిలపాలి అప్పుడే వాటి పరిష్కారానికి మార్గం దొరుకుతుంది అని ఆయన తన లేఖలో సహచరులకు పిలుపునిచ్చారు.