ED: భారాస ఎమ్మెల్యే నివాసంలో సోదాలు.. రూ.300 కోట్ల అక్రమాలు జరిగినట్టు ఈడీ వెల్లడి

[appusri]

ED: భారాస ఎమ్మెల్యే నివాసంలో సోదాలు.. రూ.300 కోట్ల అక్రమాలు జరిగినట్టు ఈడీ వెల్లడి

భారాస ఎమ్మెల్యే మహిపాల్‌రెడ్డి ఆయన సోదరుడు.. మైనింగ్‌ వ్యవహారంలో ప్రభుత్వానికి రూ.39కోట్లు నష్టం చేకూర్చినట్టు ఎన్‌ఫోర్స్‌మెంట్‌ డైరెక్టరేట్‌ (ఈడీ) అధికారులు గుర్తించారు.

 

హైదరాబాద్‌: పటాన్‌చెరు భారాస ఎమ్మెల్యే గూడెం మహిపాల్‌రెడ్డి ఆయన సోదరుడు మధుసూదన్‌రెడ్డి .. మైనింగ్‌ వ్యవహారంలో ప్రభుత్వానికి రూ.39కోట్లు నష్టం చేకూర్చినట్టు ఎన్‌ఫోర్స్‌మెంట్‌ డైరెక్టరేట్‌ (ఈడీ) అధికారులు గుర్తించారు. మొత్తం రూ.300 కోట్ల మైనింగ్‌ అక్రమాలు జరిగినట్టు అధికారులు నిర్ధరణకు వచ్చారు. సంతోష్ శాండ్‌, సంతోష్ గ్రానైట్‌ కంపెనీల ద్వారా ఈ అక్రమాలు జరిగాయని ఈడీ పేర్కొంది.

మైనింగ్‌ పేరుతో పెద్ద ఎత్తున అక్రమాలకు పాల్పడిన మహిపాల్‌రెడ్డి సోదరుల నివాసాల్లో సోదాల సమయంలో ఈడీ రూ.19లక్షల నగదు గుర్తించింది. సోదాలకు సంబంధించి శుక్రవారం ఈ మేరకు ప్రకటన విడుదల చేసింది. మనీలాండరింగ్‌, హవాలా నేపథ్యంలో సోదాలు నిర్వహించినట్టు తెలిపింది. బ్యాంకు ఖాతాల్లో కూడా అక్రమ లావాదేవీలను  గుర్తించింది. అక్రమ మార్గంలో డబ్బు మొత్తాన్ని స్థిరాస్తి రంగంలో పెట్టుబడులు పెట్టారని ఈడీ వివరించింది. బినామీ పేర్లతో లావాదేవీలను గుర్తించామని, మరి కొన్ని బ్యాంకు లాకర్లను తెరవాల్సి ఉందని అధికారులు పేర్కొన్నారు. మహిపాల్‌రెడ్డి సోదరులకు పలువురు బినామీలుగా ఉన్నట్టు దర్యాప్తులో తేలిందని తెలిపారు.

[appusri]

Enforcement: స్థిరాస్తి వ్యాపారంలోకి అక్రమ మైనింగ్‌ సొమ్ము!

పటాన్‌చెరు ఎమ్మెల్యే గూడెం మహిపాల్‌రెడ్డి సోదరుడు మధుసూదన్‌రెడ్డికి చెందిన సంతోష్‌ శాండ్‌ అండ్‌ గ్రానైట్‌ సప్లై సంస్థ అక్రమ మైనింగ్‌ ద్వారా ఆర్జించిన సొమ్మును స్థిరాస్తి వ్యాపారానికి మళ్లించినట్లు ఈడీ గుర్తించింది

 

ప్రాథమిక దర్యాప్తులో ఈడీకి ఆధారాలు లభ్యం
బినామీల పేరిట భారీగా ఆస్తుల పత్రాల స్వాధీనం 
రూ.19 లక్షల నగదు జప్తు.. బ్యాంకు లాకర్ల గుర్తింపు
పటాన్‌చెరు ఎమ్మెల్యే సోదరుడి ఇంట్లో సోదాలపై నోట్‌ విడుదల

ఈనాడు, హైదరాబాద్‌: పటాన్‌చెరు ఎమ్మెల్యే గూడెం మహిపాల్‌రెడ్డి సోదరుడు మధుసూదన్‌రెడ్డికి చెందిన సంతోష్‌ శాండ్‌ అండ్‌ గ్రానైట్‌ సప్లై సంస్థ అక్రమ మైనింగ్‌ ద్వారా ఆర్జించిన సొమ్మును స్థిరాస్తి వ్యాపారానికి మళ్లించినట్లు ఈడీ గుర్తించింది. అక్రమ మైనింగ్‌ నిధులను మనీలాండరింగ్‌ ద్వారా మళ్లించినట్లు అందిన ఫిర్యాదుతో ఈడీ బృందాలు గురువారం పటాన్‌చెరులో 10 చోట్ల సోదాలు నిర్వహించిన విషయం తెలిసిందే. ఈ క్రమంలో లెక్కల్లో లేని రూ.19 లక్షల నగదును స్వాధీనం చేసుకున్నట్లు ఈడీ అధికారులు శుక్రవారం వెల్లడించారు. ఆర్థిక లావాదేవీలకు సంబంధించిన సెల్‌ఫోన్లను సీజ్‌ చేయడంతోపాటు వీరి నివాసాల నుంచి పెద్దఎత్తున ఆస్తుల పత్రాలను స్వాధీనం చేసుకున్నట్లు ప్రకటించారు. అవన్నీ ఇతరుల పేర్లతో రిజిస్టరై ఉండటంతో వీరికి బినామీలై ఉంటారని అనుమానిస్తున్నారు. వాటి గురించి లోతుగా ఆరా తీయడం ద్వారా మనీలాండరింగ్‌పై ఆధారాలు లభిస్తాయని భావిస్తున్నారు. వారి బ్యాంకు లాకర్ల తాళాలను సైతం స్వాధీనం చేసుకున్నారు.  

రూ.39.08 కోట్ల రాయల్టీ ఎగవేత 

మధుసూదన్‌రెడ్డిపై తొలుత తెలంగాణ పోలీసులు నమోదు చేసిన ఎఫ్‌ఐఆర్‌ ఆధారంగా ఈడీ రంగంలోకి దిగింది. ప్రభుత్వం నుంచి లీజు ద్వారా అనుమతి తీసుకున్న స్థలంలో పరిమితికి మించి మైనింగ్‌ చేయడంతోపాటు ప్రభుత్వ భూమిలోనూ తవ్వకాలకు పాల్పడినట్లు దర్యాప్తులో వెల్లడైంది. అలా అక్రమంగా రూ.300 కోట్ల వరకు ఆర్జించినట్లు వెల్లడైంది. ఆ సొమ్ముపై లావాదేవీలను బ్యాంకుల ద్వారా జరగకుండా చూసినట్లు దర్యాప్తు సందర్భంగా ఈడీ అధికారుల దృష్టికి వచ్చింది. మరోవైపు మైనింగ్‌ కార్యకలాపాలపై ప్రభుత్వానికి అధికారికంగా చెల్లించాల్సిన రూ.39.08 కోట్ల రాయల్టీని మధుసూదన్‌రెడ్డి ఎగవేసినట్లు తేల్చారు. ఈ నేపథ్యంలో దర్యాప్తులో ఈడీ వేగం పెంచింది. 

సోదాల సమయంలో ఎమ్మెల్యే నిద్ర! 

పటాన్‌చెరు అర్బన్, న్యూస్‌టుడే: ఈడీ అధికారులు సోదాలు చేస్తున్న సమయంలో ఎమ్మెల్యే మహిపాల్‌రెడ్డి అక్కడే ఉన్నట్లు తెలిసింది. తనిఖీలు జరిగినంత సేపు ఇంట్లోనే ఉండి... ‘‘ఏం తనిఖీలు చేసుకుంటారో చేసుకోండి’’ అంటూ ఆయన నిద్రపోయారు. శుక్రవారం తన అనుచరులతో ఎమ్మెల్యే ఇదే విషయాన్ని పంచుకున్నారు.

[appusri]

అయితే మహిపాల్‌రెడ్డి కాంగ్రెస్ కి వెళ్ళకుండా, బిజేపి వెళ్తున్నాడు అని డిసైడ్ అవ్వొచ్చు.