K Kavitha: అమెరికాలో అదానీపై కేసు... స్పందించిన బీఆర్ఎస్ ఎమ్మెల్సీ కవిత

[psycopk]

K Kavitha: అమెరికాలో అదానీపై కేసు... స్పందించిన బీఆర్ఎస్ ఎమ్మెల్సీ కవిత 

21-11-2024 Thu 16:59 | Telangana

 

 

• ఆడబిడ్డకో న్యాయం... అదానీకో న్యాయమా? అని ప్రశ్న
• ఆధారాలు లేకపోయినా ఆడబిడ్డను కాబట్టి అరెస్ట్ చేశారన్న కవిత
• అదానీపై ఆధారాలు ఉన్నప్పటికీ అరెస్ట్ చేయడం లేదని ఆగ్రహం

ఆరోపణలపై ఆడబిడ్డకో న్యాయం... అదానీకో న్యాయమా? అని బీఆర్ఎస్ ఎమ్మెల్సీ కల్వకుంట్ల కవిత ప్రశ్నించారు. ఈ మేరకు ఆమె ఎక్స్ వేదికగా ట్వీట్ చేశారు. అఖండ భారతంలో వేర్వేరు న్యాయాలు ఏమిటని ఆమె అభిప్రాయపడ్డారు. అదానీపై అమెరికాలో లంచం ఇవ్వజూపినట్లుగా కేసు నమోదు కావడంతో ఆమె స్పందించారు.

ఆధారాలు లేకపోయినప్పటికీ ఆడబిడ్డను కాబట్టి అరెస్ట్ చేయడం ఈజీ అన్నారు. కానీ ఆధారాలు ఉన్నప్పటికీ అదానీని అరెస్ట్ చేయడం మాత్రం కష్టమా? అని ఎక్స్ వేదికగా ప్రశ్నించారు. ఎన్నిసార్లు ఆరోపణలు వచ్చినా ప్రధాని నరేంద్రమోదీ... అదానీ వైపే ఉంటారా? అని నిలదీశారు.

అఖండ భారతంలో సెలెక్టివ్ న్యాయం అందిస్తున్నారని, రాజకీయ ప్రత్యర్థులను సాక్ష్యాలు లేకుండానే అరెస్ట్ చేసి నెలల తరబడి జైల్లో ఉంచుతున్నారని, కానీ అదానీపై పదేపదే ఆరోపణలు వచ్చినా చర్యలు తీసుకోవడం లేదని ఇంగ్లీష్‌లోనూ ఆమె ట్వీట్ చేశారు. అదానీపై కేంద్ర ప్రభుత్వం చర్యలు తీసుకోకుండా ఆపుతోంది ఎవరు? అని ప్రశ్నించారు.

కవిత చాలా రోజుల తర్వాత ఎక్స్ వేదికగా స్పందించారు. జైలు నుంచి బయటకు వచ్చాక ఆమె ఆగస్ట్ 29న సత్యమేవ జయతే అని ట్వీట్ చేశారు. ఆ తర్వాత తన తండ్రి కేసీఆర్‌ను కలిసిన ఫొటోను ట్వీట్ చేశారు. ఆ తర్వాత ఆమె ఎక్స్ వేదికగా ట్వీట్ చేయడం ఇదే మొదటిసారి. ఢిల్లీ మద్యం పాలసీ కేసులో ఆరోపణలు ఎదుర్కొన్న కవిత కొన్ని నెలలు తీహార్ జైల్లో ఉన్నారు.

[psycopk]

Adani Group: అదానీపై లంచం కేసు ఎఫెక్ట్.. నిమిషాల వ్యవధిలోనే రూ.2.60 లక్షల కోట్లు నష్టపోయిన ఇన్వెస్టర్లు! 

21-11-2024 Thu 13:04 | Business

 

 

• అమెరికాలో గౌతమ్ అదానీపై లంచం, మోసపూరిత కుట్ర కేసు నమోదవడంతో తీవ్ర నష్టాలు
• గురువారం మార్కెట్లు ఆరంభంలోనే లోయర్ సర్క్యూట్లను తాకిన 10 లిస్టెడ్ కంపెనీల షేర్లు
• రూ.14,24,432.35 కోట్ల నుంచి రూ.11,91,557.79 కోట్లకు దిగజారిన కంపెనీ ఉమ్మడి మార్కెట్ క్యాపిటలైజేషన్

భారీ కాంట్రాక్టులు దక్కించుకొని లాభపడేందుకుగానూ భారతీయ అధికారులకు దాదాపుగా రూ.2,236 కోట్ల భారీ ముడుపులు చెల్లించడానికి అంగీకరించారంటూ అదానీ గ్రూప్ అధినేత గౌతమ్ అదానీపై అమెరికాలో లంచం, మోసపూరిత కుట్ర కింద నేరాభియోగాలు నమోదయిన విషయం తెలిసిందే. అరెస్ట్ వారెంట్ కూడా జారీ అయిందంటూ వార్తలు వెలువడడం అదానీ గ్రూప్‌ కంపెనీల షేర్లపై తీవ్ర ప్రతికూల ప్రభావాన్ని చూపింది. ఇవాళ (గురువారం) మార్కెట్ ప్రారంభ సెషన్‌లో అదానీ గ్రూపునకు చెందిన 10 లిస్టెడ్ కంపెనీల షేర్లు అమాంతం పతనమయ్యాయి. దాదాపు అన్ని కంపెనీల షేర్లు లోయర్ సర్క్యూట్‌ స్థాయులకు పడిపోయాయి. సుమారు 20 శాతం మేర షేర్లు క్షీణించాయి. అదానీ ఎంటర్‌ప్రైజెస్, అదానీ పోర్ట్స్, అదానీ గ్రీన్‌తో పాటు అన్ని కంపెనీల షేర్లు ఈ జాబితాలో ఉన్నాయి.

తీవ్ర అమ్మకాల ఒత్తిడితో అదానీ గ్రూప్‌నకు చెందిన 10-లిస్టెడ్ కంపెనీల్లో పెట్టుబడులు పెట్టిన ఇన్వెస్టర్లు నిమిషాల వ్యవధిలోనే ఏకంగా రూ. 2.60 లక్షల కోట్లకు పైగా నష్టపోయారు. 10 లిస్టెడ్ కంపెనీల మార్కెట్ వాల్యుయేషన్ మంగళవారం రూ.14,24,432.35 కోట్లుగా ఉండగా గురువారం  రూ.11,91,557.79 కోట్లకు దిగజారింది. దీనిని బట్టి గురువారం ఆరంభ సెషన్‌లో ఇన్వెస్టర్లు దాదాపు రూ.2.60 లక్షల కోట్ల మేర నష్టపోయారు.

అదానీ గ్రూప్‌కు చెందిన తొలి కంపెనీ అదానీ ఎంటర్‌ప్రైజెస్ లిమిటెడ్ అత్యధికంగా వాల్యుయేషన్‌ను కోల్పోయింది. ఈ కంపెనీ షేర్లు 20 శాతం దిగజారాయి. దీంతో మంగళవారం రూ. 2,820.2 వద్ద షేర్ విలువ గురువారం గురువారం రూ. 2256.2 స్థాయికి పతనమైంది. దీంతో ఈ కంపెనీ మార్కెట్ క్యాపిటలైజేషన్ ఇవాళ ఒక్క రోజే రూ.61,096.85 కోట్లు తగ్గి రూ.2,60,406.26కి పడిపోయింది.

అదానీ పోర్ట్స్ షేర్లు 20 శాతం, అదానీ గ్రీన్ ఎనర్జీ లిమిటెడ్ షేర్లు 19 శాతానికి పైగా, అదానీ పవర్ లిమిటెడ్ షేర్లు 18 శాతం, అదానీ ఎనర్జీ సొల్యూషన్స్ షేర్లు 20 శాతం, అదానీ విల్మార్ లిమిటెడ్ షేర్లు 10 శాతం.. ఇలా భారీ నష్టాలను చవిచూశాయి. అంతేకాదు... అదానీ గ్రూపు పెట్టుబడులు పెట్టిన ఇతర కంపెనీల షేర్లు కూడా భారీ నష్టపోయాయి. అంతేకాదు అదానీ గ్రూపునకు భారీగా రుణాలు ఇచ్చిన ఎస్‌బీఐ షేర్లు కూడా గురువారం పతనమయ్యాయి.