ఈ చిన్నారి రెండు సార్లు పుట్టింది!

October 25, 2016

హ్యూస్టన్‌: ఎవరికైనా ఒకటే జననం.. ఒకటే మరణం.. కానీ అమెరికాలో ఓ అద్భుతం జరిగింది. ఓ చిన్నారి పాప తల్లి కడుపు నుంచి రెండు సార్లు జన్మించింది. అదెలా సాధ్యం అని ఆశ్చర్యపోతున్నారా.. ? ఇది నిజం. అమెరికాలోని టెక్సాస్‌లో వైద్యులు అద్భుతమనిపించే సర్జరీ చేసి చిన్నారి ప్రాణాలు కాపాడారు. వివరాల్లోకెళ్తే..

మార్గరెట్‌ బోమెర్‌ అనే మహిళ 16 వారాల గర్భంతో ఉన్న సమయంలో లోపల శిశువు వెన్నెముకకు కణితి పెరుగుతున్నట్లు వైద్యులు గుర్తించారు. కొంత మంది పిల్లలకు ఇలా జరుగుతుందని.. అయితే ఈ కణితి చాలా అరుదైనదని వైద్యులు వెల్లడించారు. తల్లి కడుపులో చిన్నారితో సమానంగా కణితి కూడా పోటీ పడి పెరుగుతూ వచ్చింది. 23 వారాల గర్భం సమయంలో కణితి పరిమాణంలో చిన్నారి కంటే పెద్దగా పెరిగిపోయింది. దీని వల్ల పాప గుండె ఆగి పోయే పరిస్థితి ఏర్పడింది. కణితి తొలగిస్తే తప్ప పాప బతికే అవకాశం లేదు.

దీంతో వైద్యులు 23వారాల 5 రోజుల గర్భంతో ఉన్న బోమెర్‌కు అత్యవసరంగా శస్త్రచికిత్స నిర్వహించారు. చిన్నారిని బయటకు తీసి కణితి తొలగించి.. మళ్లీ తల్లి కడుపులో ప్రవేశపెట్టి గర్భసంచికి కుట్లువేసి ఆపరేషన్‌ పూర్తి చేశారు. ఆపరేషన్‌ 5 గంటలు జరగగా.. 20 నిమిషాల్లో శిశువు నుంచి కణితిని విజయవంతంగా తొలగించారు. మిగతా సమయమంతా జాగ్రత్తగా గర్భసంచి తెరవడానికి, తిరిగి మూయడానికి పట్టింది.

ఆపరేషన్‌ జరిగిన 12 వారాల తర్వాత ఈ ఏడాది జూన్‌లో సిజేరియన్‌ ద్వారా పాప ఆరోగ్యంగా జన్మించింది. అరుదైన ఆపరేషన్‌తో వైద్యులు పాప ప్రాణాలు కాపాడడంతో.. రెండు సార్లు జన్మించిన అరుదైన శిశువుగా పేరొచ్చింది. ఇంతకీ పాప పేరేంటో తెలుసా.. లైన్లీ హోప్‌.