ఆ చాయ్వాలా సినీ నటుడయ్యాడు!

December 21, 2016

ఇస్లామాబాద్‌: అర్షద్‌ఖాన్‌.. మొన్నటి వరకు ఎవరికీ తెలియని ఓ చాయ్‌వాలా. కానీ సోషల్‌మీడియాలో ఓ ఫొటో అతడి జీవితాన్నే మార్చేసింది. నీలికళ్లతో ప్రపంచదృష్టిని ఆకర్షించిన ఈ పాకిస్థానీ కుర్రాడు మోడల్‌గా అవతారమెత్తిన సంగతి అందరికీ తెలిసిందే. అయితే, ఇప్పుడా చాయ్‌వాలానే ఏకంగా వెండితెర అవకాశం వరించి వచ్చింది. తంతే బూరెల బుట్టలో పడ్డట్టు.. మోడలింగ్‌లో అడుగుపెట్టిన అర్షద్‌కు అప్పుడే సినిమా అవకాశం వెతుక్కుంటూ వచ్చింది.

ఈ నీలికళ్ల సుందరాంగుడు త్వరలో కబీర్‌ అనే సినిమాలో హీరో సోదరుడిగా కనిపించబోతున్నాడు. ప్రస్తుతం షూటింగ్‌ జరుపుకొంటున్న ఈ చిత్రం కోసం ఇంగ్లాండ్‌ వెళ్లనున్నాడు అర్షద్‌. అయితే తనకు ఎన్నో సినిమాల్లో అవకాశాలు వచ్చినప్పటికీ అవి నచ్చకపోవడంతో నో చెప్పినట్లు ఓ పత్రికకు ఇచ్చిన ఇంటర్వ్యూలో అర్షద్‌ పేర్కొన్నాడు. అంతేకాదండోయ్‌.. ‘చాయ్‌వాలా’ పేరిట ఇటీవల అతడు చేసిన వీడియో కూడా సూపర్‌హిట్‌ అయ్యింది.