2019లో జరిగే వన్డే ప్రపంచకప్నకు పాక్ అనుమానమే !

January 27, 2017

దుబాయ్‌: 2019లో జరిగే వన్డే ప్రపంచకప్‌ టోర్నీకి దాయాది పాకిస్థాన్‌ జట్టు నేరుగా అర్హత సాధించే అవకాశాలు తక్కువగా ఉన్నాయి. ఐసీసీ శుక్రవారం విడుదల చేసిన ర్యాంకులను పరిశీలిస్తే ఇదే విషయం గోచరిస్తోంది. తాజా ర్యాంకింగ్స్‌లో పాక్‌ 89 పాయింట్లతో ఎనిమిదో స్థానంలో నిలిచింది. బంగ్లాదేశ్‌ జట్టు 91 పాయింట్లతో పాక్‌ కన్నా మెరుగ్గా ఉండి ఏడో స్థానంలో నిలవగా వెస్టిండీస్‌ 87తో తొమ్మిదో స్థానంలో నిలిచింది.

ప్రపంచకప్‌ టోర్నీ మే 30, 2019 నుంచి జులై 15 వరకు జరగనుంది. అతిథ్య ఇంగ్లండ్‌ను మినహాయిస్తే ర్యాంకుల పరంగా మెరుగ్గా ఉన్న ఏడు జట్లు మెగాటోర్నీకి నేరుగా అర్హత సాధిస్తాయి. సెప్టెంబర్‌ 30, 2017 నాటికి జట్ల స్థానాలను బట్టి అర్హత నిర్ణయిస్తారు. ఈ లోగా పాక్‌ తన ర్యాంకు మెరుగు పరచుకోకపోతే నేరుగా అర్హత సాధించేది అనుమానమే!

ముందున్న మ్యాచ్‌లు
ఫిబ్రవరిలో యూఏఈ వేదికగా బంగ్లాదేశ్‌తో పాక్‌ రెండు టెస్టులు, రెండు వన్డేలతో పాటు 3 టీ20 మ్యాచ్‌లు ఆడనుంది. అలాగే మార్చి-ఏప్రిల్‌ మధ్య కరీబియన్‌ జట్టుతో రెండు టెస్టులు, మూడు వన్డేలు, రెండు టీ20లు ఆడనుంది. వీటితో పాటు జూన్‌ 1 నుంచి 18 వరకు ఇంగ్లండ్‌లో జరిగే ఛాంపియన్స్‌ ట్రోఫీలో పాల్గొంటుంది. ఈ లోగా పాక్‌ ర్యాంకు ఎగబాకకుంటే కష్టాలు తప్పవు. ఇటీవల ఆస్ట్రేలియాతో జరిగిన వన్డే సిరీస్‌ను ఆ జట్టు 1-4తేడాతో ముగించడం గమనార్హం.