నిద్రపుచ్చే యాప్లు

[JANASENA]

స్మార్ట్‌ఫోన్‌లు వచ్చాక తమకు నిద్ర కరువైంది అని చాలామంది చెబుతుంటారు. అది నిజమే. అర్ధరాత్రి దాటినా.. ఈమెయిల్స్‌.. సోషల్‌ మీడియా.. చాటింగ్‌లు అంటూ ఫోన్‌ తెరలకు అతుక్కుపోయి నిద్రను నిర్లక్ష్యం చేసేస్తున్నారు. అయితే ఆ నిందను పూర్తిగా ఫోన్లపై వేయడం మానుకుని.. వాటిలో ఈ యాప్‌లను వినియోగించుకుంటే మాత్రం కంటినిండా నిద్రపోవచ్చు. నిద్రను మెరుగుపరచడమే కాదు.. కొన్ని శ్వాస సంబంధ రుగ్మతులపైనా ఎప్పుడూ ఓ కన్నేసి ఉంచే వీలుంటుంది. అలా ఉపయోగపడే యాప్‌లను కొన్నింటిని చూద్దాం..

1. క్లాక్‌(ఐఓఎస్‌) 
ఐఓఎస్‌ 10 వెర్షన్‌లో కొత్తగా ఈ యాప్‌ అందుబాటులోకి వచ్చింది. దీనితో నిద్రను షెడ్యూల్‌ చేసుకోవచ్చు. రోజూ ఏ సమయానికి నిద్రపోవాలి? ఎన్నిగంటలకు లేవాలి? అన్న విషయాలను సెట్‌ చేయాలి. ఆ షెడ్యూల్‌ ప్రకారం నిద్ర పోవాల్సిన సమయం దగ్గరపడగానే ఈ యాప్‌ గుర్తు చేస్తుంది. అలాగే.. ఇందులోని స్మార్ట్‌ అలారమ్‌ పొద్దున్నే చక్కని మ్యూజిక్‌తో నిద్ర లేపుతుంది. రోజూ ఎంతసేపు నిద్ర పోతున్నారో కూడా రికార్డు చేసి ఫోన్‌లోని హెల్త్‌ యాప్‌కి పంపిస్తుంది. ఈ యాప్‌ను ఉచితంగా వాడుకోవచ్చు.

2. స్లీప్‌బోట్‌(ఆండ్రాయిడ్‌, ఐఓఎస్‌) 
ఈ యాప్‌తో ఎప్పటి నుంచి ఎప్పటి వరకు నిద్ర పోవాలో షెడ్యూల్‌ చేసుకోవచ్చు. నిద్రలో ఉన్నప్పుడు గురక పెట్టినా.. మూలిగినా.. కదిలినా ఈ యాప్‌ రికార్డు చేసేస్తుంది. ఎంతసేపు గాఢ నిద్రలో ఉంటున్నాం? రోజురోజుకు ఎలాంటి మార్పు వస్తోంది? అన్న విషయాలనూ గ్రాఫ్‌ రూపంలో చూపిస్తుంది. దీన్ని ఉచితంగా డౌన్‌లోడ్‌ చేసుకోవచ్చు.

3. గో టూ బెడ్‌(ఐఓఎస్‌) 
నిద్ర పోవాల్సిన సమయానికి అరగంట ముందుగానే ఈ యాప్‌ గుర్తు చేస్తుంది. దీంతో ఆ అరగంటలో ఏదైనా పనుంటే పూర్తి చేసుకోవచ్చు. సెన్సర్ల ద్వారా నిద్ర నాణ్యతను రోజూ రికార్డు చేస్తూ హెల్త్‌యాప్‌కు సింక్‌ చేస్తుంది.

4. నాయిస్లి(ఐఓఎస్‌, ఆండ్రాయిడ్‌) 
సన్నని రాగాలు చెవిన పడుతుంటే మనసు ప్రశాంతంగా ఉంటుంది. చాలామంది సంగీతం వింటూ నిద్రలోకి జారుకుంటారు. ఈ యాప్‌తో అలాంటి సంగీతాన్ని మనమే తయారు చేసుకోవచ్చు. వివిధ రకాల ట్యూన్‌లను మిక్స్‌ చేసుకోవచ్చు. గాఢ నిద్రలోకి వెళ్లగానే మ్యూజిక్‌ ఆగిపోయేందుకు ఈ యాప్‌లోనే టైమర్‌లో సెట్‌ చేసుకోవచ్చు. అయితే దీన్ని డౌన్‌లోడ్‌ చేసుకోవాలంటే రూ.120 చెల్లించాల్సి ఉంటుంది.

5. స్లీప్‌ జీనియస్‌(ఐఓఎస్‌, ఆండ్రాయిడ్‌) 
నాసా వ్యోమగాములకు సాయపడేలా ఈ యాప్‌ను రూపొందించారట. నిద్రలోకి జారుకునే వరకు మధురమైన మ్యూజిక్‌ను ప్లే చేస్తుంది. అలాగే ఒకేసారి మోగకుండా.. మెల్లమెల్లగా చప్పుడు చేస్తూ నిద్రలోంచి మేల్కొనేలా చేస్తుంది. ఎలా నిద్రపోతున్నామన్న విషయాలనూ రికార్డు చేస్తుంది. ప్రీమియం వెర్షన్‌లో కొన్ని అదనపు ఫీచర్లు ఉన్నాయి.