ఈ నెల 28న తేలనున్న జగన్ భవితవ్యం

April 21, 2017

హైద‌రాబాద్‌: జగన్ బెయిల్ రద్దు చేయాలన్న సీబీఐ పిటిషన్ పై ఈనెల 28న తీర్పు వెలువడనుంది. మరోవైపు కుటుంబ సభ్యులతో కలిసి న్యూజిలాండ్ వెళ్లేందుకు అనుమతివ్వాలన్న జగన్ పిటిషన్ పై కూడా న్యాయస్థానం అదే రోజున నిర్ణయం వెల్లడించనుంది. జగన్ షరతులను ఉల్లంఘించారని, కాబట్టి బెయిల్ రద్దు చేయాలని సీబీఐ కోరింది. సాక్షులను ప్రభావితం చేయరాదన్న షరతును జగన్ ఉల్లంఘించారని.. ప్రభుత్వ మాజీ ప్రధాన కార్యదర్శి రమాకాంత్ రెడ్డి ఇంటర్వ్యూను సాక్షి టీవీలో ఇచ్చారని సీబీఐ ప్రధాన వాదన. సాక్షి నిర్వహణతో, రమాకాంత్ రెడ్డి ఇంటర్వ్యూతో తనకు సంబంధం లేదనేది జగన్ వాదన. సీబీఐ పిటిషన్ ను కొట్టివేయాలని కోర్టును జగన్ కోరారు. సీబీఐ తరఫున ప్రత్యేక పబ్లిక్ ప్రాసిక్యూటర్ సురేందర్, జగన్ తరఫున సీనియర్ న్యాయవాది నిరంజన్ రెడ్డి వాద‌న‌లు వినిపించారు. సీబీఐ ప్రత్యేక న్యాయస్థానంలో సుమారు నాలుగు గంటల పాటు వాదనలు జరిగాయి. జగన్, విజయ్ సాయిరెడ్డి విచారణకు హాజరయ్యారు. ఇరువైపుల వాదనలు విన్న సీబీఐ కోర్టు నిర్ణయాన్ని ఈనెల 28కి వాయిదా వేసింది.
మే 15 నుంచి జూన్ 15 మధ్య పదిహేను రోజులు కుటుంబ సభ్యులతో కలిసి న్యూజిలాండ్ వెళ్లేందుకు అనుమతివ్వాలని జగన్ పిటిషన్ దాఖలు చేశారు. ప్రస్తుత దశలో విదేశాలకు వెళ్లడానికి జగన్ కు అనుమతి ఇవ్వవద్దని సీబీఐ అభ్యంతరం వ్యక్తం చేసింది. జగన్ పిటిషన్ పై నిర్ణయాన్ని కూడా ఈనెల 28న న్యాయస్థానం వెల్లడించనుంది.