Nice research on rapes by madhumita pande

[Crazy_Robert]

సమాజంలో వీధికో కీచకుడు! నాలుగైదేళ్ల పసి మొగ్గల నుంచి వృద్ధమహిళల వరకూ రక్షణ లేకుండా పోతున్న రోజులివి. బడులు, గుడులు, వీధులు, ఇళ్లూ...ఎక్కడకు వెళ్లినా మహిళలకు భద్రత అన్నది గాలిలో దీపమే. దిల్లీలో నిర్భయ ఘటన అనంతరం దేశవ్యాప్తంగా పెద్ద ఉద్యమమే పెల్లుబికింది. అత్యాచారాలకు పాల్పడే మృగాళ్లకు ఉరిశిక్ష విధించాలనే డిమాండ్‌ చట్టరూపం దాల్చింది. అయినా...అత్యాచార అకృత్యాలు నిత్యం వెలుగుచూస్తూనే ఉన్నాయి. ఈ నేరగాళ్లు ఎక్కడి నుంచి పుట్టుకు వస్తున్నారు? వీరెందుకు ఇలాంటి హీనమైన చర్యలకు పాల్పడుతున్నారు? వీరిని ఆ దిశగా ప్రేరేపిస్తున్నవి ఏమిటి? అనే ప్రశ్నలకు ఓ యువతి సమాధానాలు అన్వేషించే యత్నం చేసింది. మధుమిత పాండే అనే 26ఏళ్ల విద్యార్థిని తన పరిశోధనాత్మక పత్రం కోసం తీహార్‌ జైలులో అత్యాచార కేసుల్లో శిక్ష అనుభవిస్తున్న వంద మంది నేరాగాళ్లతో ముఖాముఖీ మాట్లాడింది. దిల్లీలో పుట్టిపెరిగిన ఆ యువతి బ్రిటన్‌లోని ఆంగ్లియా రస్కిన్‌ విశ్వవిద్యాలయానికి చెందిన నేరవిచారణశాస్త్ర (క్రిమినాలజీ) విభాగంలో పీహెచ్‌డి చేస్తోంది. తొలుత 2013లో ప్రయోగాత్మక ప్రాజెక్టుగా అత్యాచార నేరగాళ్లను ఇంటర్వ్యూ చేశారు. ఈ క్రమంలోనే మూడేళ్లలో 100 మందికిపైగా ఖైదీలతో మాట్లాడారు. పరిశోధనలో తన దృష్టికి వచ్చిన అంశాలను ఆమె వివరించారు. అతి సామాన్యులు!  ‘‘సమాజం దృష్టిలో అత్యాచార నేరగాళ్లు నరరూపరాక్షసులు. మనిషన్న వాడు ఇలాంటి అకృత్యాలకు పాల్పడడన్నది దేశంలోని అత్యధికుల అభిప్రాయం. తీహార్‌ జైలులో శిక్షలు అనుభవిస్తున్న వారిలో అత్యధికులు నిరక్షరాస్యులు. కొద్ది మంది మాత్రమే పాఠశాల విద్యను పూర్తి చేశారు. అందరూ భావిస్తున్నట్లుగా వీరేమీ అసాధారణమైన వ్యక్తులు కాదు. అతి సాధారణ మనుషులు. వారు పుట్టిపెరిగిన వాతావరణం..ఆలోచనా ధోరణులే వారిని అలాంటి నేరాలకు పురికొల్పాయి’’అని మధుమిత తెలిపారు. లైంగిక విద్యకు పిల్లలు దూరం  ‘‘దేశంలోని విద్యావంతుల కుటుంబాల్లోనూ మహిళలు సాంప్రదాయకమైన విధులకే పరిమితమవుతున్నారు. చాలా మంది మహిళలు తమ భర్తలను పేరు పెట్టి పిలవలేరు. ఇక పురుషులు తామేదో ప్రత్యేకమైనట్లు వ్యవహరిస్తారు. మహిళలు అణకువగా, లొంగి ఉండాలనే భావంతోనే పెరుగుతున్నారు. పిల్లల పెంపకంలోనూ ఇదే ధోరణి కనిపిస్తుంది. లైంగిక విద్యకు పాఠ్యాంశాల్లో చోటులేదు. ఇంటి దగ్గర తల్లిదండ్రులూ చెప్పరు. అత్యాచారం అంటే ఏమిటో వివరించరు. జననాంగాలకు సంబంధించి ప్రతిదీ ఓ రహస్యంగానే ఉంచుతారు. ఈ పరిస్థితుల్లో మగపిల్లలకు లైంగికపరమైన అంశాల్లో విజ్ఞానం ఎలా అందుతుంది?’’ అని మధుమిత ప్రశ్నించారు. ‘‘జైలు శిక్ష అనుభవిస్తున్న నేరగాళ్లలో కొందరికి అత్యాచారం అంటే ఏమిటో తెలియదు. తాము అలాంటి నేరానికి పాల్పడ్డామన్న స్పృహ కొద్ది మందిలోనే ఉంది. శృంగారానికి మహిళ అంగీకారం అవసరమన్న ఆలోచన చాలా మందికి తెలియదు’’ అనే విషయం వారితో మాట్లాడిన సందర్భంలో తెలియవచ్చిందని మధుమిత వెల్లడించారు. నేరగాళ్లలో కొందరు తాము చేసింది తప్పేనని అంగీకరించటంతో పాటు అందుకు తీవ్ర పశ్చాత్తాపాన్ని వ్యక్తం చేశారని ఆమె తెలిపారు. ఐదేళ్ల బాలికపై అత్యాచారానికి పాల్పడిన నేరగాడైతే...శిక్ష పూర్తయి జైలు నుంచి బయటకు వచ్చిన తర్వాత ఆమెను పెళ్లి చేసుకుంటానని చెప్పినప్పుడు తాను నిర్ఘాంతపోయానని మధుమిత పేర్కొన్నారు . ఈ వివరాలన్నిటితో త్వరలో తాను తీసుకొచ్చే పుస్తకంపై తీవ్ర విమర్శలు వస్తాయని, ఓ మహిళ అయ్యి ఉండి ఇటువంటి పరిశోధన చేయటమేమిటని ప్రశ్నించే వారూ ఉంటారని మధుమిత అన్నారు. అయినప్పటికీ అత్యాచారాలకు పురిగొల్పుతున్న అసలు కారణాలను అడ్డుకోకుండా కేవలం శిక్షలతోనే వాటిని నిరోధించలేమన్న అభిప్రాయాన్ని మధుమిత పాండే వ్యక్తం చేస్తున్నారు. జైలులో ఉన్న అత్యాచార నేరగాళ్లు సరే...సమాజంలో ఉన్న మృగాళ్ల పరిస్థితి ఏమిటని ఆమె ప్రశ్నించారు.