సినీతారల చిత్రాలు అసభ్యకరంగా మార్పు.. నిందితుల అరెస్టు

November 8, 2017

ఈనాడు, హైదరాబాద్‌: సినీ తారల చిత్రాలను అసభ్యంగా మార్చి వెబ్‌సైట్లో పెడుతున్న ఇద్దరు నిందితులను తెలంగాణ సీఐడీలోని సైబర్‌ విభాగం పోలీసులు అరెస్టు చేశారు. కొన్ని వెబ్‌సైట్లలో తమను అసభ్యంగా చిత్రీకరిస్తున్నారని మూవీ ఆర్టిస్ట్‌ అసోసియేషన్‌ సభ్యులు గతంలో ఫిర్యాదు చేసిన సంగతి తెలిసిందే. దీంతో దర్యాప్తు జరిపిన సీఐడీ పోలీసులు గుజరాత్‌లోని అహ్మదాబాద్‌కు చెందిన ఠాగూర్‌ మహేష్‌కుమార్‌ జయంత్‌జి, ఠాగూర్‌ బాలుసిన్హాలు 5 వెబ్‌సైట్ల ద్వారా ఈ పని చేస్తున్నట్లు గుర్తించారు. దీనికి సంబంధించి వీరిద్దర్నీ అహ్మదాబాద్‌లో అరెస్టు చేసిన తెలంగాణ పోలీసులు స్థానిక కోర్టులో హాజరుపరిచారు. అనంతరం పీటీ వారెంటుపై వీరిని హైదరాబాద్‌ తీసుకువచ్చి మంగళవారం సీఐడీ న్యాయస్థానంలో హాజరుపరిచి రిమాండుకు తరలించారు. నిందితులిద్దరికీ తెలుగు తెలియనప్పటికీ అన్ని భాషలకు సంబంధించిన ప్రముఖ సినీతారల వివరాలు తెలుసని, దాంతో వారి ఫొటోలను అసభ్యంగా చిత్రీకరించి వెబ్‌సైట్లలో పెడుతున్నారని సీఐడీ అధికారులు వివరించారు. నిందితుల నుంచి 4 లాప్‌టాప్‌లు, 2 ఫోన్లు, 3 సిమ్‌కార్డులు స్వాధీనం చేసుకున్నామని వారు తెలిపారు.