Parrot creates panic in Oregon

[Demigod]

చిలుక ఎంత పనిచేసిందంటే..! 

ఇంటర్నెట్‌డెస్క్‌: ఆర్డర్‌ చేసిన వస్తువులు ఇచ్చేందుకు డెలివరీ బాయ్‌ ఓ ఇంటికి వెళ్లాడు. ఆ సమయంలో ఇంట్లో నుంచి ఓ మహిళ ‘ఏడుస్తూ రక్షించండి.. రక్షించండి’.. అని కేకలు వేయడం అతడికి వినిపించింది. మహిళ ఏదో ప్రమాదంలో ఉందని గ్రహించిన డెలివరీ బాయ్‌ వెంటనే 911కి కాల్‌ చేశాడు. సమాచారం అందుకున్న పోలీసులు హుటాహుటిన అతడు చెప్పిన ఇంటి దగ్గరికి వచ్చి తలుపులు తెరిచి లోపలికి ప్రవేశించారు. ఇంట్లో ఎవరూ ప్రమాదంలో పడలేదు. మరి ఆ అరుపులు చేసింది ఎవరా..? అని పోలీసులు గమనించారు. ఇంతకీ హెల్ప్‌.. హెల్ప్‌.. అని అరిచింది ఎవరో తెలుసా..! ఓ చిలుక. దాని పేరు డియాగో.

అమెరికాలోని ఒరెగాన్‌ స్టేట్‌లోని పోలీసులకు ఈ వింత అనుభవం ఎదురైంది. ఓ ఇంటికి ఆర్డర్‌ ఇచ్చేందుకు వచ్చిన లీ పుర్డే అనే యూపీఎస్‌ డెలివరీ బాయ్‌ నిజంగానే మహిళ అరుపులు విని ప్రమాదంలో ఉందనుకొని పోలీసులకు ఫోన్‌ చేశాడు. తీరా పోలీసులు వచ్చి ఇళ్లంతా చూడగా ఓ చిలుక అలా అరుస్తూ కనిపించింది. అలా అని దానికేమీ దెబ్బలు కూడా తగల్లేదు. సరదా కోసం అది చేసిన అరుపులు కాసేపు పోలీసులను తిప్పించాయి. చివరికి చిలుక అలా అరిచిందని గ్రహించిన పోలీసులు నవ్వుకున్నారు. డియాగో యజమాని సుసాన్‌ బైర్డ్‌ దీనిపై మాట్లాడుతూ.. ‘పనిమీద బయటకు వెళ్లాను. దానికి ఒంటరిగా అనిపించి అలా అరిచినట్లుంద’ని ఆమె వివరణ ఇచ్చింది.