langa veshalu

[Navyandhra]

ప్రేమించానన్నాడు.. పెళ్లయినా వదల్లేదు! 
మార్ఫింగ్‌ చిత్రాలతో సామాజిక మాధ్యమాల్లో వేధింపులు 
నిందితుడిపై ఎస్సీ, ఎస్టీ కేసు నమోదు 

హైదరాబాద్‌: తనకు పరిచయం ఉన్న యువతి వేరే వ్యక్తిని పెళ్లి చేసుకోవడంతో కక్ష పెంచుకున్న యువకుడు.. బాధితురాలి చిత్రాల్ని మార్ఫింగ్‌ చేసి సామాజిక మాధ్యమాల్లో ఉంచి వేధింపులకు పాల్పడిన ఘటన రాచకొండ కమిషనరేట్‌ పరిధిలో చోటు చేసుకుంది. సైబర్‌క్రైమ్‌ ఇన్‌స్పెక్టర్‌ జె.నరేందర్‌గౌడ్‌ తెలిపిన వివరాల ప్రకారం.. మంచాల మండలం చీదేడు గ్రామానికి చెందిన చింతకాయల సురేశ్‌.. ఇబ్రహీంపట్నంలోని ఓ కళాశాలలో చదువుతున్న యువతితో పరిచయం పెంచుకున్నాడు. కొంతకాలం తర్వాత ఆ యువతి వేరే వ్యక్తిని పెళ్లి చేసుకోనుందని తెలియడంతో కక్ష పెంచుకున్నాడు. ఓరోజు ఆ యువతి ఇబ్రహీంపట్నం ప్రయాణ ప్రాంగణం వద్ద బస్సు కోసం వేచి చూస్తున్నప్పుడు అక్కడికి వెళ్లిన సురేశ్‌.. ఆమె చరవాణిని బలవంతంగా లాక్కున్నాడు. వాటిలోనుంచి ఆమె చిత్రాల్ని డౌన్‌లోడ్‌ చేశాడు. బాధితురాలు తనతో కలిసి ఉన్నట్లు చిత్రాలను మార్ఫింగ్‌ చేశాడు. బాధితురాలిని పెళ్లి చేసుకోబోయే యువకుడికి ఆ చిత్రాల్ని పంపించాడు. విషయం తెలుసుకున్న బాధితురాలు.. తన సోదరితో కలిసి సురేశ్‌ ఇంటికి వెళ్లి గొడవ చేసింది. దీంతో సురేశ్‌ తల్లిదండ్రులు జోక్యం చేసుకొని చరవాణి తిరిగి ఇవ్వడంతో వివాదం సద్దుమణిగింది. అనంతరం బాధితురాలికి పెళ్లయిపోయినా సురేశ్‌ వేధింపులు మానలేదు. బాధితురాలి మార్ఫింగ్‌ చిత్రాల్ని ఫేస్‌బుక్‌లో అప్‌లోడ్‌ చేశాడు. అలాగే బాధితురాలి గ్రామం పేరుతో ఉన్న వాట్సప్‌ గ్రూపులో వాటిని షేర్‌ చేయడంతోపాటు ఆమె చరవాణికి చిత్రాలు, వీడియోలు పంపుతూ వేధింపులు తీవ్రం చేశాడు. సురేశ్‌ ఆగడాలు భరించలేక బాధితురాలు రాచకొండ సైబర్‌క్రైమ్‌ పోలీసుల్ని ఆశ్రయించింది. సురేశ్‌పై నిర్భయ, ఐటీ, ఎస్సీ, ఎస్టీ చట్టాల కింద కేసులు నమోదు చేశారు. నిందితుడి చరవాణి సీజ్‌ చేసి రిమాండ్‌కు తరలించారు.

[WHAT]

[WHAT]