Karnataka Elections and Telugu Votes

[AndhraneedSCS]

బెంగళూరు (యశ్వంతపుర), న్యూస్‌టుడే: ఆంధ్రప్రదేశ్‌ ప్రత్యేక హోదా అంశంతో కర్ణాటక ఎన్నికలలో రాజకీయ పార్టీలు చేపట్టిన ప్రచారం మిశ్రమ ఫలితాలిచ్చింది. భాజపాయేతర పార్టీలన్నీ హోదా అంశాన్ని విస్తృతంగా ప్రజల్లోకి తీసుకెళ్లగా, భాజపా నేతలు తమదైన శైలిలో దాన్ని అడ్డుకున్నారు. తెలుగు ఓటర్లు అధికంగా ఉండే మొత్తం 65 నియోజకవర్గాల్లో 31 కాంగ్రెస్‌, 21 భాజపా, 12 జేడీఎస్‌లు గెలుపొందాయి. బెంగళూరులోని జయనగర స్థానంలో ఎన్నిక వాయిదా పడిన విషయం తెలిసిందే. తెలుగు ఓటర్లు ఎటువైపు మొగ్గుచూపుతారోనని అన్ని పార్టీల అభ్యర్థులు ఆందోళన చెందారు. భాజపాలో ఇది మరింత ఎక్కువగా కనిపించింది. హోదా ప్రభావం తెలుగు ఓటర్లపై పడకుండా భాజపా నేతలు ఒక పద్ధతి ప్రకారం ప్రచారం చేశారు. కేంద్ర మాజీ మంత్రి కృష్ణంరాజు, సినీ నటి కవిత, భాజపా నాయకురాలు పురందేశ్వరి తదితరుల్ని తీసుకొచ్చి సమావేశాలు నిర్వహించారు. తెలుగు ఓటర్లు గణనీయంగా ఉన్న స్థానాల్లో విజేతల వివరాలిలా ఉన్నాయి. 
* బెంగళూరు నగరంలోని హెబ్బాళ, బ్యాట్రాయనపుర, కృష్ణరాజపుర, శాంతినగర, బి.టి.ఎం.లేఅవుట్‌, శివాజినగర, గాంధీనగర నియోజకవర్గాల్లో కాంగ్రెస్‌ గెలుపొందగా, యలహంక, మహదేవపుర, బెంగళూరు దక్షిణ, చిక్కపేట, సి.వి.రామన్‌నగర, పద్మనాభనగరలో భాజపా, దాసరహళ్లిలో జేడీఎస్‌ పార్టీల అభ్యర్థులు గెలుపొందారు. 
* బెంగళూరు గ్రామీణ జిల్లాలోని దొడ్డబళ్లాపుర కాంగ్రెస్‌కు, నెలమంగళ, దేవనహళ్లి జేడీఎస్‌కు దక్కాయి. 
* కోలారు జిల్లాలోని కోలారు జేడీఎస్‌కు, ములబాగిళులో కాంగ్రెస్‌ మద్దతు ఉన్న స్వతంత్ర అభ్యర్థి విజయం సాధించగా, మాలూరు, బంగారుపేట, కేజీఎఫ్‌, శ్రీనివాసపురలో కాంగ్రెస్‌ పార్టీ గెలుపొందింది. 
* తుమకూరు జిల్లాలోని తుమకూరు, చిక్కనాయకనహళ్లిలో భాజపా, తుమకూరు గ్రామీణ, మధుగిరి, శిర నియోజకవర్గాలలో జేడీఎస్‌, పావగడ, కొరటగెరెలో కాంగ్రెస్‌ విజయం సాధించాయి. 
* చిక్కబళ్లాపుర జిల్లాలోని చిక్కబళ్లాపుర, గౌరిబిదనూరు, బాగేపల్లి, శిడ్లఘట్టలలో కాంగ్రెస్‌, చింతామణి నియోజకవర్గం జేడీఎస్‌కు దక్కాయి. 
* బళ్లారి జిల్లాలోని బళ్లారి గ్రామీణ, హొసపేటె, కంప్లి, హూవినహడగలి, హగరిబొమ్మనహళ్లి నియోజకవర్గాల్లో కాంగ్రెస్‌ అభ్యర్థులు, బళ్లారి నగరం, సిరుగుప్ప, కూడ్లిగి నియోజకవర్గాలు భాజపా వశమయ్యాయి. 
* రాయచూరు జిల్లాలోని రాయచూరు పట్టణం, దేవదుర్గ భాజపాకు, రాయచూరు గ్రామీణం, లింగసుగూరు కాంగ్రెస్‌కు, సింధనూరు, మాన్వి నియోజకవర్గాలు జేడీఎస్‌కు దక్కాయి. 
* హైదరాబాద్‌-కర్ణాటక ప్రాంతంలోని కలబురగి జిల్లాలో కలబురగి పట్టణం ఒక్కటే భాజపాకు దక్కగా, చిత్తాపూర్‌, జీవర్గి, హుమ్నాబాద్‌, బీదర్‌ కాంగ్రెస్‌కు, గుర్మిట్కల్‌, బీదర్‌ గ్రామీణ జేడీఎస్‌కు వచ్చాయి. 
* కొప్పళ జిల్లాలో కొప్పళ కాంగ్రెస్‌కు, గంగావతి, కనకపుర భాజపాకు దక్కాయి. 
* చిత్రదుర్గం జిల్లాలోని చిత్రదుర్గం, మొలకాల్మూరు భాజపాకు, చెళ్లకెర కాంగ్రెస్‌కు వశమయ్యాయి. 
* దావణగెరె దక్షిణ నియోజకవర్గాన్ని కాంగ్రెస్‌ చేజిక్కించుకుంది.