3 రోజుల్లో ఎన్నికలు.. జగన్ మాత్రం లోటస్ పాండ్ ను వదలట్లేదు

[vatsayana]

https://telugu.gulte.com/tnews/32655/3-

ఎన్నికల ప్రచారానికి మూడంటే మూడు రోజుల ముందు ఎంత హడావుడి ఉంటుంది?  ప్రజల వద్దకు వెళ్లి.. తమ పార్టీని గెలిపించాలంటూ విన్నపాల మీద విన్నపాలు చేయటం కనిపిస్తుంది. లెక్క వేసుకొని మరీ ప్రచారానికి వెళ్లే తెలంగాణ రాష్ట్ర ముఖ్యమంత్రి కేసీఆర్ లాంటి అధినేత సైతం ప్రచారం మీద ప్రచారం చేస్తుంటే.. ఏపీ విపక్ష నేత.. వైఎస్సార్ కాంగ్రెస్ పార్టీ అభ్యర్థి జగన్మోహన్ రెడ్డి మాత్రం అందుకు భిన్నంగా వ్యవహరిస్తున్న తీరును పలువురు తప్పు పడుతున్నారు. 

గతానికి భిన్నంగా ఏపీ ఎన్నికల్లో ఈసారి సెంటిమెంట్ ఎక్కువగా ఉంది. ఏపీ రాజకీయాల్లో కేసీఆర్ వేలు పెట్టటంపైన ఏపీ ముఖ్యమంత్రి చంద్రబాబు అదే పనిగా ప్రస్తావించటం.. కేసీఆర్.. జగన్ దోస్తానా మీద కూడా హాట్ హాట్ చర్చ సాగుతోంది. రాజకీయాల్ని పార్ట్ టైంగా చేస్తున్నారంటూ విమర్శలు ఎదుర్కొనే జనసేన అధినేత పవన్ కల్యాణ్ సైతం హైదరాబాద్ వదిలేసి.. ఏపీకి వచ్చేయగా.. సొంతింటిని ఏర్పాటు చేసుకున్న జగన్ మాత్రం నిత్యం హైదరాబాద్ కు వెళ్లటం ఆసక్తికరంగా మారింది.

ఎంత టైట్ షెడ్యూల్ ఉన్నా.. ప్రచారాన్ని పూర్తి చేసుకొని హైదరాబాద్లోని తన సొంత నివాసమైన లోటస్ పాండ్ కు వెళ్లటం.. అక్కడి నుంచే కార్యకలాపాల్ని సమీక్షించటం జగన్ కు అలవాటుగా మారింది. ఈ విషయాన్ని ప్రత్యర్థులు తప్పు పడుతూ.. వేలెత్తి చూపిస్తున్నారు. అయినప్పటికీ జగన్ లో మాత్రం మార్పురాని పరిస్థితి. ఎన్నికల ప్రచారానికి మూడు రోజులు ముందు కూడా ఆయన లోటస్ పాండ్ లో పలువురిని కలుసుకోవటం.. జగన్ తో భేటీ కావాలంటే హైదరాబాద్ కు రావాల్సిందేనన్న అభిప్రాయం వ్యక్తమవుతోంది.

ఇలాంటివేళ.. జగన్ తీరుపైన విమర్శలు వెల్లువెత్తుతున్నాయి. తెలంగాణ రాష్ట్ర ముఖ్యమంత్రి కేసీఆర్ ఏ రీతిలో అయితే.. ఫాంహౌస్ నుంచి పాలన చేస్తుంటారో.. అదే తీరులో రేపొద్దున జగన్ చేతికి అధికారం వస్తే లోటస్ పాండ్ కేంద్రంగా ఏపీ పాలన సాగుతుందా?  అన్న ప్రశ్న పలువురిని వేధిస్తోంది.  రాష్ట్ర విభజన తర్వాత.. తెలంగాణతో సంబంధం లేని.. అచ్చంగా ఏపీ మీద దృష్టి  పెట్టే అధినేతను ఏపీ ప్రజలు కోరుకుంటున్నట్లుగా చెబుతున్నారు. ఇందుకు భిన్నంగా జగన్ మాత్రం.. లోటస్ పాండ్ కు వెళ్లందే.. మనసు ఊరుకోనట్లు వ్యవహరించటం ఆయనకు మైనస్ గా మారతుందంటున్నారు. 

కేసీఆర్ కు ఫాంహౌస్ ఎలానో.. జగన్ కు లోటస్ పాండ్ అలా మారిందన్న విమర్శ అంతకంతకూ ఎక్కువ అవుతోంది. ఈసారి ఎట్టిపరిస్థితుల్లో ఏపీ ముఖ్యమంత్రి కావాలని తపిస్తున్న జగన్.. ఇలాంటి విమర్శల్ని లైట్ తీసుకుంటే భారీ మూల్యాన్ని చెల్లించాల్సి వస్తుందన్న మాట వినిపిస్తోంది. వింటున్నారా జగన్?