బయటకొస్తే బండి స్వాధీనం నేటి నుంచి అమలుకు

April 8, 2020

బయటకొస్తే బండి స్వాధీనం

నేటి నుంచి అమలుకు ట్రాఫిక్‌ పోలీసుల నిర్ణయం

ఈనాడు, హైదరాబాద్‌: వైద్య సంబంధ, అత్యవసర కారణాలు మినహా చిన్న, చిన్న కారణాలు చెబుతూ రోడ్లపైకి వచ్చే వారిపై పోలీసులు కఠినంగా వ్యవహరించనున్నారు. వాహనాలను స్వాధీనం చేసుకొని లాక్‌డౌన్‌ ఎత్తివేశాకే వాటిని అప్పగిస్తారు. వాహనదారులు ఇష్టారాజ్యంగా రోడ్లపైకి వస్తుండడంతో మంగళవారం వరకూ హెచ్చరికలతో సరిపెట్టిన పోలీసులు తాజాగా ఈ నిర్ణయం తీసుకున్నారు. ఎస్సార్‌నగర్‌, ఎర్రగడ్డ, అమీర్‌పేట, బంజారాహిల్స్‌, జూబ్లీహిల్స్‌, పంజాగుట్ట, అమీర్‌పేట, పాతబస్తీ ప్రాంతాల్లో మంగళవారం వందల సంఖ్యలో వాహనాలు రోడ్లపైకి వచ్చాయి. ఈ అంశాన్ని తీవ్రంగా పరిగణించిన ఉన్నతాధికారులు కమాండ్‌ కంట్రోల్‌ రూం ద్వారా ట్రాఫిక్‌ పోలీసులకు ఆదేశాలిచ్చారు. మంగళవారం ప్రతి కూడలి వద్ద గంటగంటకూ ట్రాఫిక్‌ పరిస్థితిని పరిశీలించారు. ఉదయం 10 గంటల నుంచి మధ్యాహ్నం 2 వరకూ వాహనదారులను ఆపి హెచ్చరించి ఇళ్లకు పంపించారు.