ప్రశ్నిస్తే విధ్వంసమా.. చంద్రబాబు సీరియస్..

[DaatarBabu]

అమరావతి : ఆంధ్రప్రదేశ్‌లో గత కొన్ని రోజులుగా జరిగిన పరిణామాలపై మాజీ ముఖ్యమంత్రి, టీడీపీ అధినేత చంద్రబాబు నాయుడు సీరియస్ అయ్యారు. మంగళవారం నాడు పార్టీ సీనియర్ నేతలతో చంద్రబాబు వీడియో కాన్ఫరెన్స్ నిర్వహించారు. ఈ సందర్భంగా ఆయన మాట్లాడుతూ సీఎం జగన్ మోహన్ రెడ్డిపై, కేబినెట్ మంత్రులపై తీవ్ర ఆగ్రహం వ్యక్తం చేశారు. వైసీపీ ప్రజావ్యతిరేక విధానాలను ప్రశ్నిస్తే ఆస్తుల విధ్వంసం చేస్తారా? అని అధికార పార్టీని ఆయన ప్రశ్నించారు.

 

తెలుగు తమ్ముళ్ల కేసులు, అరెస్ట్‌ల గురించి..

టీడీపీ నేత సబ్బం హరి ఇంటి ప్రహరీ కూల్చివేత, పట్టాభి కారు ధ్వంసం ఈ రెండు ఘటనలూ కక్ష సాధింపేనని బాబు సీరియస్ అయ్యారు. మాజీ ఎమ్మెల్యే బీసీ జనార్ధన్‌రెడ్డిని వేధించడాన్ని ఆయన తీవ్రంగా ఖండించారు. 18ఏళ్ల క్రితం అంశంపై కడప టీడీపీ నేత హరిప్రసాద్‌ను అరెస్ట్ చేయడం గర్హనీయమన్నారు. మాజీ మంత్రి జవహర్‌పై తప్పుడు కేసు వైసీపీ కక్ష సాధింపేనని.. జ్యోతుల నవీన్‌పై ఎస్సీ, ఎస్టీ కేసు పెట్టడం దుర్మార్గమన్నారు.

మంత్రుల గురించి..

జగన్ కేబినెట్‌లో.. ఒకరు బూతుల మంత్రి, మరొకరు హవాలా మంత్రి, ఇంకొకరు బెంజ్ మినిస్టర్ అని చంద్రబాబు ఆరోపించారు. సీఎం జగన్ రెడ్డి కథ ఇక ప్రత్యేకంగా చెప్పక్కర్లేదన్నారు. ఇంత దుర్మార్గమైన పార్టీని, ప్రభుత్వాన్ని తానెప్పుడూ చూడలేదన్నారు. మనం చేస్తోంది దుర్మార్గులతో పోరాటమని అనుక్షణం అప్రమత్తంగా ఉండాలని తెలుగు తమ్ముళ్లకు చంద్రబాబు సూచించారు. రాష్ట్రంలో పోలీసుల పనితీరుపై ఓ వైపు న్యాయస్థానాల ఆగ్రహం చేస్తూ.. మరోవైపు ఎన్‌సీఆర్‌బీ నివేదిక అక్షింతలు వేస్తున్నాయని చంద్రబాబు చెప్పారు. దళితులపై దాడులు, దౌర్జన్యాలు ఆగడం లేదన్నారు. మూడు నెలల్లో మూడు జిల్లాలలో ముగ్గురికి శిరోముండనాలు జరిగాయని ఇది వైసీపీ దమనకాండకు పరాకాష్ట అని చంద్రబాబు వ్యాఖ్యానించారు.