dB యువతకు పిలుపునిచ్చిన ప్రధాని!

[r2d2]

జనవరి 15, 16 తేదీల్లో జరిగే ‘స్టార్టప్‌ ఇండియా’ అంతర్జాతీయ సమావేశంలో యువత భాగస్వాములు కావాలని ప్రధాని మోదీ పిలుపునిచ్చారు. ఈ మేరకు సోమవారం ఆయన ట్విటర్‌లో పోస్టు చేశారు. పరిశ్రమలు, బ్యాంకింగ్‌, ఫైనాన్స్‌, విద్యా రంగాల్లో అంకుర సంస్థలు నెలకొల్పిన అనేకమంది విజేతలను ఈ సమావేశంలో భాగంగా కలిసే అవకాశం ఉంటుందని ప్రధాని తెలిపారు. ఈ ట్వీట్‌లో ప్రధాని తన లింక్డ్‌ఇన్‌ పోస్టును జత చేశారు. ‘‘ కరోనా కారణంగా వర్చువల్‌గా అందర్నీ కలవడం సాధారణమైపోయింది. యువత ఇంట్లోనే కూర్చొని ఆసక్తికరమైన జాతీయ, అంతర్జాతీయ సమావేశాల్లో పాల్గొనడం, అందర్నీ కలవడం అనేది చాలా మంచి ఆలోచన. ఇటువంటి అవకాశమే జనవరి 15, 16 తేదీల్లో ‘ప్రారంభ్‌’ కల్పిస్తోంది. ఇటువంటి అవకాశాన్ని వినియోగించుకోవాలని నేను యువతకు పిలుపునిస్తున్నాను.’’ అని ప్రధాని మోదీ తెలిపారు. 

సాంకేతికతను అందిపుచ్చుకుంటే అన్ని విధాలుగా మనం ముందుంటామని ప్రధాని తెలిపారు. నా వరకు ఆన్‌లైన్‌లో పరిశోధకులు, వైద్యనిపుణులు, కొవిడ్‌ వారియర్లు, పారిశ్రామికవేత్తలు, వంటి అనేక మందిని కలవడం ద్వారా ఎక్కువ పనిని పూర్తి చేయగలిగానని ప్రధాని వెల్లడించారు. స్టార్టప్‌ ఇండియాను ప్రారంభించి ఐదేళ్లు గడిచాయని ప్రధాని తెలిపారు. భారతదేశ యువత సామర్ధ్యంపై తనకు విశ్వాసముందన్నారు. పట్టణాల నుంచే కాకుండా చిన్న గ్రామాల నుంచి వచ్చిన వారు కూడా స్టార్టప్‌లు ప్రారంభించడం మంచి ప్రయత్నమన్నారు.