Bengaluru Rains: ఓవైపు వరదల్లో నగరం.. దోశ తింటూ ఎంజాయ్‌ చేసిన భాజపా ఎంపీ

[Undilaemanchikalam]

తేజస్వి సూర్యపై విమర్శల వెల్లువ

బెంగళూరు: ఇటీవల కురిసిన భారీ వర్షాలకు బెంగళూరు నగరం వరదల్లో మునిగిపోయింది. మూడు, నాలుగు రోజులైనా పలు ప్రాంతాలు ఇంకా వరద నీటిలోనే చిక్కుకుపోయాయి. ఓవైపు నీటిలో మునిగిన ఇళ్లు, కార్యాలయాలు మరోవైపు రోజువారీ పనులకు వెళ్లేందుకు నగర పౌరులు సతమతమవుతోన్న దృశ్యాలు అక్కడి పరిస్థితులను కళ్ళకుకడుతున్నాయి. ఇటువంటి తరుణంలో నియోజకవర్గ ప్రజలకు బాసటగా నిలవాల్సిన ఓ ఎంపీ దోశ తినుకుంటూ బాగుందంటూ ప్రచారం చేయడం విమర్శలకు దారితీసింది. బెంగళూరు సౌత్‌ లోక్‌సభ స్థానానికి ప్రాతినిధ్యం వహిస్తోన్న భాజపా ఎంపీ తేజస్వి సూర్య తీరుపై సామాజిక మాధ్యమాల్లో ఆగ్రహం వ్యక్తమవుతోంది.

ఎంపీ తేజస్వి సూర్య తన నియోజకవర్గం పరిధిలోని పద్మనాభనగర్‌లో ఉన్న ఓ హోటల్‌లో అల్పాహారం తింటున్న వీడియో సోషల్‌ మీడియాలో ప్రస్తుతం వైరల్‌గా మారింది. అందులో బటర్‌ మసాలా దోశ, ఉప్మా తింటున్న ఆయన.. నాణ్యతతోపాటు రుచికరంగా ఉందంటూ ప్రశంసించారు. అంతేకాకుండా ప్రజలు కూడా ఆ హోటల్‌కి వచ్చి రుచి చూడాలని సిఫార్సు చేశారు. ఈ వీడియోను ట్విటర్‌లో పోస్టు చేసిన కాంగ్రెస్‌ నేత లావణ్య బళ్లాల్‌.. బెంగళూరు నగరం వరదల్లో చిక్కుకుపోతే.. మన ఎంపీ మాత్రం దోశ తింటూ ఎంజాయ్‌ చేస్తున్నారని విమర్శించారు. వరద ప్రభావిత ప్రాంతాల్లో ఆయన కనీసం ఒక్క చోటైనా పర్యటించారా? అంటూ ప్రశ్నించారు.

 

 

 

తేజస్వి సూర్య వీడియోను ట్విటర్‌లో షేర్‌ చేసిన నటి, కాంగ్రెస్‌ మాజీ ఎంపీ రమ్య.. ‘ఒకవేళ మీరు ఇతర హోటళ్లను ప్రమోట్‌ చేయాలి అనుకుంటే ఓఆర్ఆర్‌పై మనం కలుద్దాం. బెంగళూరు సౌత్‌ ఓటర్లు అక్కడ పనిచేస్తున్నారు’ అంటూ వ్యంగ్యాస్త్రాలు విసిరారు.

ఓవైపు భారీ వర్షాలతో నగరం మునిగిపోతుంటే ‘రోమ్‌ తగలబడుతుంటే నీరో చక్రవర్తి ఫిడేల్‌ వాయించినట్లుంది తేజస్వి దోశ తింటున్న తీరు’ అని ఆమ్‌ఆద్మీ పార్టీ నేత పృథ్వీ రెడ్డి విమర్శించారు.

మరో ట్విటర్‌ యూజర్‌ మాత్రం.. తేజస్వి గడిచిన మూడు రోజుల్లో కేజ్రీవాల్‌పై 240 ట్వీట్లు, రాహుల్‌ గాంధీపై 17 ట్వీట్లు, మోదీని ప్రశంసిస్తూ 137 ట్వీట్లు చేశాడు కానీ, బెంగళూరు వరదలపై మాత్రం ఒక్క ట్వీట్‌ చేయలేదంటూ మండిపడ్డారు.

ఇక మరొక యూజర్‌ స్పందిస్తూ.. కారణం ఏమీ లేకున్నా కాంగ్రెస్‌ పాలిత రాష్ట్రాల్లో వాలిపోయే తేజస్వి.. నగరం వరదల్లో చిక్కుకున్నప్పుడు మాత్రం ‘కనిపించడం లేదు’ అంటూ విమర్శించారు. ఇలా భాజపా ఎంపీ తేజస్వి సూర్య వీడియోపై సోషల్‌ మీడియాలో ట్రోల్స్‌ నడుస్తున్నాయి.

[Mediahypocrisy]

Dosa gatti chatni tho tinnado....